Reseña: «Roma soy yo» de Santiago Posteguillo

 Dedico la tercer reseña d’esti blogue a esti valencianu tan famosu nel ámbitu literariu hispanu en xeneral, y de novela histórica en particular. La novela Roma soy yo, espublizada en 2022, ye la primera d’una triloxía sobre Xulio César. Entamé a lleela cuando saliera y preferí dexala a la metá a la espectativa de que rematara la triloxía y depués poder lleer tolos llibros más siguíos. De momentu, llevo solamente’l primeru.

La novela pretende recrear la infancia y primer mocedá de Xulio César, usando como tema del tiempu presente'l xuiciu contra’l procónsul optimate Dolabela, en que Xulio César con malpenes 23 años representó a un grupu de macedonios que denunciaben a Dolabela polos sos abusos de poder, corrupción y crímenes mientres gobernaba como procónsul na provincia de Macedonia (aproximadamente la metá norte de l’Actual Grecia continental). A lo llargo del llibru Posteguillo va encaxando con bon criteriu varies analepsis (flashbacks) en que conocemos la hestoria del éxitu militar de Cayo Mario en Aqueae Sextiae, que sería un referente moral pal so sobrín Xulio César, y de quien heredaría les sos idees polítiques populares, cómo César de guaḥe conoz a la esposa, Cornelia, los sos enfrentamientos col dictador optimate Sila como sucesor políticu y moral de Cayo Mario o el so triunfu militar en Mitilene (Lesbos) que-y apurrió una corona triunfal.

Posteguillo algama un equilibriu ente una literatura pa disfrutar y una novela con rigor. Pa poder falar con criteriu de dellos episodios de la vida de César, o recrear un xuiciu d’aquella dómina (yá que los discursos del xuiciu como tal nun los conservamos, solo sabemos quién participó y cuálu foi’l resultáu), Posteguillo diz al final del llibru qu’acudió a espertos na materia, tanto d’historia de Roma como de drechu romanu. Sicasí, los personaxes son vivos y con una marcada personalidá, especialmente bien desendolcaos (pal mi gustu) Cayo Mario (tíu de César y líder popular), Sila (dictador optimate) y Aurelia (ma de César y autoridá moral ya intelectual de la Casa Xulia). Pa facer esto obviamente tien que recurrir a delles invenciones, maxime cuando nun tenemos muncha información de la infancia y mocedá de César nel barriu de Subura.

Sicasí, los eventos políticos y tolo relacionao colos vezos romanos paecen siguir un bon criteriu y ser realistes, cosa que demuestra la enorme formación de Posteguillo na materia, teniendo en cuenta que nin ye historiador nin ye clasicista, sinón filólogu inglés. Amás ente les páxines de Roma soy yo atopamos un usu detalláu de términos llatinos, bien sían conceptos políticos, bien d’usu diariu. Tamién recuerre a delles referencies culturales de l’Antigüedá, como mentar unos versos de Safo antes de César llegar a Lesbos. Sobre esta cuestión, debo dicir que’l lector que nun sepa llatín nun tien que preocupase, porque’l llibru cuenta con abondes notes esplicando conceptos y hai tamién al final un glosariu de pallabres y espresiones en llatín utilizaes.

A diferencia de les reseñes anteriores, con histories más fantástiques y heroiques, equí tenemos un realismu per una banda mui políticu, y una épica tamién mui realista y militar. Personalmente yo nun soi mui fan del tema bélicu, y la forma en que Posteguillo narra batalles como la d’Aquae Sextiae o Mitilene fízoseme amena, darréu que lo plantega siempre desde una partida d’estratexa de los personaxes y con discursos davezu motivantes y profundos. Teniendo en cuenta que ye de les poques veces que disfruto lleendo una batalla, esto paezme un puntu mui positivu.

Quedo coles ganes de lleer les otres dos noveles, que dirán cayendo a lo llargo d’estos meses.

Si tas interesáu en temes de xuicios y abogaos, na novela histórica realista y/o na sociedá ya historia de la Roma republicana, esta lectura ye imprescindible.

Si quies lleer otres reseñes que fici sobre les noveles de Madeline Miller, de tema griegu y con más elementos fantásticos, puedes lleeles calcando equí baxo: 

Reseña: Circe de Madeline Miller

Reseña: The song of Achilles de Madeline Miller