Lleí la obra por recomendación de varies persones, la primera una collacia, tamién filóloga clásica y profesora, y foi la mio primer novela del branu de 2025. Llegué a ella sin pasar primero per The Song of Achilles, cola que de momentu nun podré comparar.
Esti llibru ye una novela en primer persona sobre un episodiu de la vida de la bruxa Circe y emprincipia colos sos años atrapada y maltratada por so pa, el titán Helios, y el restu d'hermanos y primos, y remata cola so lliberación de la islla d'Eea y fuxida con Telémaco. Miller mantién un bon ritmu a lo llargo de la mayor parte de la hestoria, en que vemos como Circe pesie a la so inmortalidá madura col pasu de los sieglos. La primer Circe ye poco más qu'una guaḥa que desconoz el so talentu, pasa a una segunda Circe desterrada n'Eea que da la sensación de recién independizada y empoderada y remata con una tercer Circe madura y que psicolóxicamente acaba integrada ente los mortales casi como una más.
![]() |
Circe Invidiosa de Waterhouse (1892) |
Una de les coses que más me prestó d'esta llectura foi precisamente lo bien que se nota la evolución psicolóxica del personaxe, a quien acompañamos nes sos casi 450 páxines. Miller nun tien reparu en humanizar muncho a los sos personaxes y danos interpretaciones nueves d'ellos. Los dioses caracterícense mayormente pola so maldá (remarco'l casu d'Atenea), Circe tien arrebatos d'odiu y venganza especialmente cola so familia, pero desendolca un apegu polos mortales que la decepcionará. Como nes películes modernes de les villanes de Disney, nesta novela comprendemos por qué Circe convierte a los homes que lleguen a la so islla en gochos. Tamién se nos dan dos visiones d'Odiseo, l'héroe y el sádicu, y Miller profundiza tamién nun perfil de Penélope y Telémaco que yeren pa mi hasta agora más bien planos.
Too esto recuérdame a les Heroides d'Ovidio, que yá a entamos de la nuesa era fixo una suerte de fanfic en que les muyeres de la mitoloxía griega s'espresaben al traviés de cartes dirixíes a los homes y héroes que yá conocemos. Seique Madeline Miller ofreznos una Carta d'Heroida moderna, con Circe como protagonista.
L'únicu puntu negativu que destaco de la novela ye que la última parte pierde un poco el ritmu, pero en resume foi un viaxe a la Grecia de los Héroes que agradezo y encamiento a cualquier llector de fantasía.
No hay comentarios:
Publicar un comentario