«Sappho» de Franz Grillparzer

Safo saltando a la mar de Théodore Chassériau

Con esta reseña afito’l primer noyu ente les mios dos especialidaes: la filoloxía clásica y l’alemana. La cultura grecollatina llamámosla clásica precisamente porque foi el canon y la materia d’inspiración, creación, recreación, versión y reacción de la mayor parte del arte européu hasta anguañu. Una muestra d’ello ye la obra dramática del austríacu Franz Grillparzer, que conocí gracies a un monumentu que tien nel centru de Viena.

Ente les sos obres tien una triloxía dedicada a los Argonautes y la traxedia que nos toca: Sappho.  

L’argumentu de la obra ye’l suicidiu de Safo por desamor, tema recurrente cuando falamos de la vida d’esta poetisa. De la vida real de Safo nun sabemos gran cosa, asina que l’espaciu pa divagar ya inventar ye ampliu. Nesti casu, dos elementos importantes van ser Faón, de quien Safo taba namorada, y Melita, la esclava de la que s’encaprichará Faón. Esti Faón en cuestión ye un personaxe mitolóxicu, un home de belleza estraordinaria por mor de la maxa d’Afrodita que como intercambiu de favores da-y esta guapura. El motivu de Safo namorada de Faón apaez yá nos clásicos llatinos, darréu qu’Ovidio nes sos Heroides inclúi una carta ficticia de Safo a Faón. Poro, nun podemos atribuir esta idea a Grillparzer.

La obra divídese en cinco actos. Sicasí, pa mi la división principal de la obra ye les trés formes en que caracteriza a la poetisa: la Safo triunfante y alabada, la Safo alloriada y la Safo apoteósica (nel sen etimolóxicu del términu). De mano recibimos a Safo como una muyer estimada na so comunidá, que llega cola corona de lloréu tres la so victoria lírica n’Olimpia ente vítores ya ixuxús de los habitantes de Mitilene. 

Reseña: «Roma soy yo» de Santiago Posteguillo

 Dedico la tercer reseña d’esti blogue a esti valencianu tan famosu nel ámbitu literariu hispanu en xeneral, y de novela histórica en particular. La novela Roma soy yo, espublizada en 2022, ye la primera d’una triloxía sobre Xulio César. Entamé a lleela cuando saliera y preferí dexala a la metá a la espectativa de que rematara la triloxía y depués poder lleer tolos llibros más siguíos. De momentu, llevo solamente’l primeru.

La novela pretende recrear la infancia y primer mocedá de Xulio César, usando como tema del tiempu presente'l xuiciu contra’l procónsul optimate Dolabela, en que Xulio César con malpenes 23 años representó a un grupu de macedonios que denunciaben a Dolabela polos sos abusos de poder, corrupción y crímenes mientres gobernaba como procónsul na provincia de Macedonia (aproximadamente la metá norte de l’Actual Grecia continental). A lo llargo del llibru Posteguillo va encaxando con bon criteriu varies analepsis (flashbacks) en que conocemos la hestoria del éxitu militar de Cayo Mario en Aqueae Sextiae, que sería un referente moral pal so sobrín Xulio César, y de quien heredaría les sos idees polítiques populares, cómo César de guaḥe conoz a la esposa, Cornelia, los sos enfrentamientos col dictador optimate Sila como sucesor políticu y moral de Cayo Mario o el so triunfu militar en Mitilene (Lesbos) que-y apurrió una corona triunfal.

Posteguillo algama un equilibriu ente una literatura pa disfrutar y una novela con rigor. Pa poder falar con criteriu de dellos episodios de la vida de César, o recrear un xuiciu d’aquella dómina (yá que los discursos del xuiciu como tal nun los conservamos, solo sabemos quién participó y cuálu foi’l resultáu), Posteguillo diz al final del llibru qu’acudió a espertos na materia, tanto d’historia de Roma como de drechu romanu. Sicasí, los personaxes son vivos y con una marcada personalidá, especialmente bien desendolcaos (pal mi gustu) Cayo Mario (tíu de César y líder popular), Sila (dictador optimate) y Aurelia (ma de César y autoridá moral ya intelectual de la Casa Xulia). Pa facer esto obviamente tien que recurrir a delles invenciones, maxime cuando nun tenemos muncha información de la infancia y mocedá de César nel barriu de Subura.

Reseña: «The Song of Achilles» de Madeline Miller

    Por fin, y diendo en contra del sentíu de publicación de Miller, lleí la famosa Canción d’Aquiles. Esta foi la so primer novela y la más conocida, qu’entovía podemos atopar en munchos escaparates de llibreríes d’Asturies. Escríbela en 2011 ya inaugura esti percorríu literariu de l’autora consistente en garrar hestories de l’Antigüedá Griega y vertiles nuna novela con un formatu actual. Nesti casu pue qu’incluso escediéndose.

    The song of Achilles cuéntanos la hestoria de Patroclo y Aquiles dende’l destierru de Patroclo, qu’acaba en Ftía na corte de Peleo, pá d’Aquiles, hasta la muerte d’esti últimu. Miller ponnos nel papel de Patroclo, que será el narrador en primera persona d’esta riestra d’años. Esta narración parcial nun quita que la novela ta enllena d'ironíes tráxiques, esto ye, referencies a un futuru deseáu o tarrecíu que nós como lectores yá conocemos.

    Pa poder respetar esta distancia temporal, el ritmu de la novela requerirá d’elipsis narratives pa dir saltando d’un momentu clave al siguiente. Sicasí, en caúna d’estes paraes o capítulos, tendremos un ritmu llentu abondo como pa conocer en profundidá a los personaxes y ver florecer l’enamoramientu adolescente de Patroclo por Aquiles.

Reseña: «Circe» de Madeline Miller

 Circe (2018) ye'l nome de la segunda novela de Madeline Miller, clasicista d'Estaos Xuníos y autora tamién de la famosa novela The Song of Achilles (2011). El llibru ye una adaptación de diversos mitos clásicos alredor de la figura de Circe en forma d'una novela de xéneru fantásticu.

 Lleí la obra por recomendación de varies persones, la primera una collacia, tamién filóloga clásica y profesora, y foi la mio primer novela del branu de 2025. Llegué a ella sin pasar primero per The Song of Achilles, cola que de momentu nun podré comparar. 

 Esti llibru ye una novela en primer persona sobre un episodiu de la vida de la bruxa Circe y emprincipia colos sos años atrapada y maltratada por so pa, el titán Helios, y el restu d'hermanos y primos, y remata cola so lliberación de la islla d'Eea y fuxida con Telémaco. Miller mantién un bon ritmu a lo llargo de la mayor parte de la hestoria, en que vemos como Circe pesie a la so inmortalidá madura col pasu de los sieglos. La primer Circe ye poco más qu'una guaḥa que desconoz el so talentu, pasa a una segunda Circe desterrada n'Eea que da la sensación de recién independizada y empoderada y remata con una tercer Circe madura y que psicolóxicamente acaba integrada ente los mortales casi como una más.