Resume de les Guerres Astur-Cántabres, por Lucio Aneo Floro

[46] Pal Occidente, casi toa Hispania taba pacificada, sacantes la que daba coles últimes peñes de los Pirineos na costa nel Océanu (1) más cercana (2). Equí incordiaben dos pueblos bien fuertes, los cántabros y los astures, que nun cayeron baxo l’imperiu. [47] L’espíritu de los cántabros yera superior, más rudu y más rebelde. Non contentos con defender la so propia llibertá, tamién tentaben de dominar a los más cercanos y [48] nun dexaben tranquilos a vacceos, turmogos y autrigones por mediu de numeroses incursiones. Asina pues, como yera conocío qu’actuaben con más violencia, nun se mandó nenguna espedición contra ellos, sinón qu’él mesmu, Augusto, tomó la inicativa. Él mesmu vieno a Sasamón (3), llantó un campamentu, rodió primero a toa Cantabria con un exércitu partíu en tres y congregó a esi salvaxe pueblu como si fueran fieres, prácticamente como con una trampa de caza. [49] Nun había tranquilidá nin si quier del Océanu, al atacalos una tropa enemiga pela retaguardia. Primero llucharon contra los cántabros baxo los muros de Bérxida(4). D’equí colaron de sópitu pal monte Vindiu, onde creyeran que subíen antes les foles del Océanu que les armes de los romanos. 

Las Médulas, esplotación aurífera col usu de la técnica de Ruina Montium. Esta esplotación trabayábenla fundamentalmente astures pa Roma. Fuente de la imaxe.

[50] En tercer llugar opúnxose virulentamente la ciudá d’Aracelio(5), que, sicasí, acabó conquistada. Al final asocedió el sitíu del monte Medulo, qu’atacaron per tolos llaos con fosos permanentes de 18 milles mientres los romanos s’averaben. Depués de que los bárbaros vieran la so retaguardia, con empeñu adelantaron la so muerte con fueu, armes y venenu ente l’alimentu, venenu qu’allí se saca tradicionalmente del texu. Asina la mayoría d’ellos se llibró de la esclavitú, que daquella paecía-yos a ellos, indómitos, más grave que la propia muerte.
[51] Esto llegó-y a César(6) a través de los legaos Antistio, Furnio y Agripa, mientres él pasaba l’iviernu nes costes de Tarragona. [52] Pronto él mesmu tuvo p’allá y sacábalos de los montes, llevábalos colos rehenes y poníalos a la venta como esclavos por derechu de guerra. [53] La fazaña abultó-y al Senáu digna d’alabanza y de carru triunfal; pero César yera yá tan poderosu que nun-y importaba’l triunfu.
[54] Los astures daquella baxaron de los montes ñevaos con una bayura guerreros. Nun-yos paecía a los bárbaros un ataque temerosu ya imprevistu, sinón que montaron campamentu onde’l ríu Esla(7) con un pelotón xebráu en tres partes y prepárense p’atacar tres campamentos romanos al empar. [55] Hubiera sío confusa, sangrienta y axallá un desastre pa dambos la batalla con homes tan fuertes, [56] tan de sópitu, tan decidíos toos, si nun los abandonaran los Brixecinos, qu’avisaron a Carisio(8) y vieno col exércitu. Afogar les sos intenciones foi como una victoria, pero nun pue dicise que la batalla se resolviera sin sangre.
[57] La poderosísima ciudá de Lancia(9) recibió los restos del exércitu derrotáu, onde colos sitios hasta allí se lluchó, de mou que, cuando se reclamaron antorches pa quemar la ciudá capturada, por poco nun consigue’l xeneral licencia pa que quedara en pie y se convirtiera en mayor recuerdu de la victoria de Roma que si la quemaben. [58-59] Pa Augusto foi esti el fin de les campañes militares, lo mesmo el fin de la rebelión n’Hispania. En siguida hubo verdadera fidelidá y paz eterna, en parte pola naturaleza d’ellos mesmos, más proclive a la paz. Tamién lo consiguió poles intenciones del César, que temía que se guardaran na seguridá de los montes y mandólos baxar a vivir nel so propiu campamentu nel llanu, qu’ellí tuviera el conceyu del pueblu y qu’aquel sitiu fuera la capital. Favorecía a esta decisión la naturaleza de la rexón, que yera casi entera mina d’oru y fonte de crisócoles, minios y otros colorantes. Asina, mandó trabayar la tierra. Los astures, por ello, entamaron a conocer les sos riqueces baxo tierra, precisamente cuando les buscaben y sacaben pa otros. 

Esti testu ye un epítome de Lucio Aneo Floro, autor de los sieglos I-II d.C., d'orixe africanu, que fizo resúmenes de les histories de Tito Livio. Na so obra muestra, entre otres coses, a los pueblos estranxeros como indómitos y ayenos a la llei y la xusticia, fala d'ellos como d'animales salvaxes, como se muestra nesti fragmentu sobre los cántabros.

Tien tamién na so obra delles imprecisiones xeográfiques, nesti casu paez facer referencia al Golfu de Biscaya, cuando realmente los astures habitaben l'actual Asturies ente los ríos Navia y Seya, bona parte de Lleón, incluyendo la cuenca del ríu Esla (Astura), el Bierzu y parte de Galicia pela provincia d'Ourense. Los cántabros, más al este, ocupaben l'actual Cantabria, parte del Oriente d'Asturies y del norte de les actuales Palencia y Burgos.

Na obra ensame de toos estos resúmenes cuéntase la hestoria de Roma como dividida n'edaes d'una persona. La infancia, la mocedá, la madurez y la veyez. Esto tamién lo ficiera Livio (Pról. 9), Cicerón (De rep. II 1, 3 y 11,1) y Salustio (Conj. 51, 40; Yug. 2, 3 y 10, 6).

Tien abonda importancia na obra Hispania, país en que vivió Floro, concretamente en Tarraco, tierra que consideró eruditrix y bellatrix, i.e., mayestra y semilleru del exércitu en palabres de G. Hinojo Andrés ya I. Moreno Ferrero(10). De manera asemeyada a la de César, xustificando la so conquista de la Galia, Floro recuerre a falar del carácter violentu de los conquistaos y les sos intenciones de conquistar a vecinos (vemos nesti casu a los cántabros), que sirve pa xustificar la imposición del poder romanu qu'acabará na pax romana d'Augusto.

(1) L’océanu Atlánticu 
(2) Con respectu a Roma, esto ye, pal Golfu de Biscaya 
(3) Segisama en llatín, actualmente Sasamón ye una población del norte de Burgos. 
(4) Ciudá amurallada in illo tempore. Güei nun ta habitao. 
(5) Desconozse qué ciudá foi exactamente, pue ser Araquil, cerca d’Iruña, o Aradillos, cerca de Reinosa. 
(6) Entiéndase por César a Cayo Xulio César Augusto Octaviano, príncipe de Roma, non a Cayo Xulio César, conquistador de la Galia y dictador de Roma, tío-güelu del primeru y padre adoptivu al empar. 
(7) Conocíu en llatín como ríu Astura, ye’l que da nome a los astures y a Asturica Augusta, inicialmente campamentu romanu y depués ciudá poderosa pa controlar Gallaecia, capital del Conventus Asturicensis, actual Astorga. 
(8) Carisio foi propretor d’Hispania Ulterior y fundador d’Emerita Augusta, actual Mérida. 
(9) Ciudá fortificada al sur de Lleón.
(10) ANEO FLORO, L.: Epítome de la historia de Tito Livio. Traducción y notes de Gregorio Hinojo Andrés ya Isabel Moreno Ferrero, editorial Gredos en Madrid, 2000, pax. 61.