Los terremotos na Antigüedá: "Nun sabemos a qué dios convendría facer sacrificios cuando la tierra se mueve."
Paez que la causa del porqué de los temblores de tierra ye incierto pal sentíu y opinión común de la xente. Y, amás, entá güei nun se sabe con seguridá, como tampoco averiguaron del too nin si quier los físicos si los covarones y resquiebros de la tierra yeren por vientu subterráneo o polos golpes y foles d’agua axitao subterráneo, asina como paez que los griegos más antiguos, que llamaben a Neptuno σεισίχθονα (“el que sacude la tierra”), xulgaben si yeren por alguna otra cosa o pola fuerza y voluntá d’otru dios.
Por eso los antiguos romanos, que, como en toles obligaciones diaries, yeren mui meticulosos y cautelosos pa les xeres relixoses y l’adoración de los dioses inmortales, cuando sentíen o s’enteraben de que la tierra se movía, mandaben establecer díes festivos por edictu. Sicasí, obviaben afitar y publicar el nome del dios al que había que dedica-y la festividá, como yera corriente, pa nun venceyar al pueblu a un falsu cultu por nomar al dios equivocáu. Si daquién profanara eses fiestes y por eso fuera necesaria una espiación, sacrificaben una víctima “yá sía al dios yá sía a la diosa”, y asina taba contemplao por decretu de los Pontífices, según M. Varrón, darréu que yera desconocío tanto la fuerza como’l dios o diosa que facía temblar la tierra.
Pero, sobre los eclipses lunares y solares, nun s’interesaben menos en descubrir la causa d’esti fenómenu. Sicasí, M. Catón, anque yera un home con gran interés nel conocimientu de les coses, conxeturó sin cuidáu coses poco segures sobre esti asuntu. Les palabres de Catón na obra Oríxenes, IV son:“Nun presta escribir lo que ta na tabliella del Máximu Pontífice, como cuántes veces llega la esperada collecha añal o cuántes veces una borrina o daqué tapez la lluz de la lluna o del sol” (1)
Tan poco importante yera pa él saber o dicir les verdaderes razones de la desapaición del sol y la lluna.
Gel. 2, 28 (sieglu II d.C.)
(1) El Pontífice Máximu notaba nunes tablielles esti tipu de sucesos naturales como eclipses, estrelles fugaces, probablemente terremotos, etc. Yera, amás, el Colexu de Pontífices l'encargáu de marcar el calendariu. Estos documentos sirvieron, ente otres coses, pa facer cronoloxíes relatives de la historia de Roma. Pincha equí pa saber más.
