Saturnales: fiestes de Navidá dedicaes al dios del cuchu.

¿Por qué se celebra la Navidá n’avientu? 

Muncha xente cree que la Navidá ye una fiesta esclusivamente cristiana y que debemos agradece-yla a aquel presuntu fíu de Dios que presuntamente nació n’avientu. ¿Ye esto verdá? Sin entrar, lo menos de momentu, nel tema del nacimientu de Xesucristo, lo más probable ye que naciera pa marzu o abril, y non n’avientu. ¿Entós por qué se celebra nesti mes la Navidá?

Los cristianos, nel so intentu de convertir paganos a la so relixón, tuvieron qu’adaptase de munches maneres. Una d’elles foi facer coincidir les sos fiestes coles que yá existíen, pa mayor aceptación, o incluso asimilar elementos d’eses tradiciones orixinales, casu de l’Árbol de Nadal, que se toma de les cultures nórdiques, del Yggdrasil, árbol sagráu que representa l’universu.

Pero lo central de la Navidá vien de les Saturnales romanes, como la fecha, los banquetes, la familiaridá, etc. Yeren les Saturnales les fiestes d’avientu de los romanos, y p’aprender el so orixe vamos lleer a Macrobio, qu’escribió abondo d’esti tema:

<<Celebráis a Saturno con un honor mayor al de los demás y, si nun supón problema, querría que me lo esplicarais.>> Avieno, señalando a Pretextáu como impaciente por preguntar, diz: <<pue dicise que tolos que tán presentes destaquen por una sabiduría asemeyada, sin embargu, únicamente Vetio pue informate sobre asuntos sagraos, tanto del orixe del cultu a esti dios como aclarate la causa de la so fiesta solemne.>>Anque Pretextáu tentó de pasá-y la bola a los otros, toos consiguieron que fuera él quien lo contara. Entós fízose el silenciu y entamó:

<<La llei de los dioses permíteme contar aquel llonxanu orixe de les Saturnales, pero non lo que se refier a la naturaleza misteriosa de la divinidá, sinón lo que, se discute, amestóse-y a los cuentos o lo que los físicos espliquen al pueblu. Ye que les teoríes ocultes y que manen de la fonte de la verdá pura nun se pue narrales mientres les ceremonies, y si daquién les sigue, mándase que les caltenga ocultes na cabeza. Lo que se pue saber d’elles, según la llei de los dioses, seguramente’l nuestru amigu Horo les reconoza. Esa rexón qu’agora se llama Italia taba baxo’l poder de Xano (Ianus). Él, como cuenta Hixino (que sigue a Portarco Tralliano), poseía esa tierra con Camese, tamién nativu d’allá, y compartíen el poder. Por eso mesmo la rexón llamábase Camesena y la ciudá Xanículo. Depués Xano quedó solu nel poder. Él, se cree, amosaba un rostru ximielgu (de dos cares), pa poder observar lo que tenía delantre y tamién lo que tenía detrás. Esto ye una referencia, sin duda, a la intelixencia y habilidá del rei, que conocía’l pasáu y preveía’l futuru, igual que Antevorta y Postvorta, buenes compañeres e la divinidá, que tamién yeren adoraes ente los romanos. Un día Saturno llegó con una flota y Xano acoyólu con hospitalidá y d’elli aprendió la pericia del campu, cosa qu’ameyoró aquella forma de vida ruda y salvaxe que teníen antes de conocer los frutos [l’agricultura]. Por eso, recompensólu compartiendo con él el reináu.

El primeru que acuñó moneda preservó nella el respetu a Saturno porque, como aquél llegó en barcu, imprimió nuna parte de la moneda la forma de la cabeza del dios, y na otra la d’un barcu, pa propagar asina la memoria de Saturno a la posteridá. Asina s’acuñaba daquella’l dineru y por eso güei entiéndese que, nos xuegos d’azar, los guajes llancen los denarios y griten “¡cara o barcu!”, como vestixu de l’Antigüedá.

Estos dos, en fin, reinaron xuntos la ciudá y fundaron ciudaes vecines como obra común, amás Marón diz:

Esta llamábase Xanículo, aquella Saturnia

Too esto taba al descubiertu, porque los que vinieron depués dedicáron-yos dos meses continuos, ún, Avientu, tuvo la fiesta de Saturno, l’otru, Xineru, el nome de Xano (Xanuariu > Xineru). Entós Saturno de sópitu nun volvió a apaecer, y Xano pensó n’aumentar los honores a aquél. Primero bautizó tola tierra qu’apaecía como “Saturnia”, depués fundó un altar con festivos sagraos como a un dios, y llamólos “Saturnales”.

Per tantos sieglos preceden les Saturnales a la dómina de la ciudá de Roma. Asina que mandó que se lu adorara como nuna relixón, por consideralu preceptor d’una vida meyor. Muestra d’ello ye la so estatua, a la que-y añadió una foz, símbolu de la collecha. Atribúinse a esti dios los inxertos de nuevos brotes, la cría de frutos y otres disciplines pa cultivar cualquier tipu de cosa fértil. Amás, los cirenses, cuando-y faen un sacrificiu, corónense con figos verdes y únviense mutuamente tortes de miel y de frutos como forma d’apreciu al so creador, Saturno. Los romanos tamién lu llamaben “Stercutum” (“Cucheru”), porque foi el primeru en utilizar el cuchu pa fertilizar.>>

                                                                              Macrobio, Saturnalia, I, VII, 16-25

Como diz, les Saturnales son les fiestes dedicaes al dios Saturno. Esti Dios, ún de los mayores ente los romanos, xunto con Xúpiter o Vesta, yera’l dios y padre de l’agricultura, y ente les sos formes taba la de Saturnus Stercutus, más o menos “Saturno el cucheru”, por ser él quien entamó a usar el cuchu na agricultura.

Esta lectura pue quedar curtia, darréu que, igual que nel cristianismu, los romanos tamién tiraben de mitos y relixón pa esplicar les sos fiestes. La importancia de los mitos precristianos (anque tamién los cristianos) ye que d’ellos puen estraese histories reales que van llenándose de fantasía.

Nesti casu paez mui claro. Les Saturnales son en primer instancia una fiesta dedicada a l’agricultura y na que se faen grandes comíes (como güei día). Esto se debe a que les fiestes d’avientu se correspuenden cola fin de la collecha, cuando hai una bayura de productos del campu y celébrense en grandes banquetes. De fechu, les fiestes tamién s’aprovechen pa pidir a Saturno que protexa les semientes que van cultivase n’iviernu pa que dean frutos cuando vuelva’l bon tiempu. 

¿Qué se facía mientres les fiestes Saturnales?

Les fiestes nun se diferencien muncho del Nadal actual, sobretoo hai comíes onde participaba tola familia, y cuando dicimos familia, ye nel sentíu romanu: incluyendo a los esclavos (famuli). De fechu ye nestes feches cuando los esclavos tienen completes llibertaes y comparten mesa colos amos, como pue vese nestos fragmentos:

<<Tiénense los tiempos del so reináu por mui felices, darréu que, pola abundancia de coses, daquella tovía naide se distinguía como esclavu o llibre. Estes coses puen vese en como mientres les Saturnales se permiten toles llibertaes a los esclavos.>>

Macrobio, Saturnalia, I, VII, 16-25

[...] pero d’entre estes causes que se contaron sobre l’orixe de la fiesta, destaca que les Saturnales son más vieyes que la ciudá de Roma, tanto qu’antes de Roma en Grecia entamara una vez al añu, según L. Accio nos sos Annales:

La mayor parte de los griegos, sobremanera en Atenes, a Saturnodedicaben festivos, que continuamente llamen [fiestes] Cronies,y celebren esti día; pelos campos y les ciudaes prácticamente toosdedíquense felices a facer banquetes, y caún curiaa los sos esclavos, como faen los nuestros; y d’ellí vieno la tradición,según la cual los esclavos comen colos amos nel mesmu sitiu.                                                                 

Accio, Anales lib. inc. frag. 3

 en Macrobio, Saturnalia, I, VII, 36

Nesti últimu fragmentu, amás de la incansable obsesión de los romanos con querer paecese en too a los griegos, intúise una ruptura coles divisiones sociales por motivu de llibertá o riqueza. N’otros fragmentos, déxase ver nel cultu a Saturno un recuerdu d’aquellos llonxanos antiguos que vivieron una dómina onde primaba lo común y la comunidá, pa F. Engels una reminiscencia d’aquel “comunismu” primitivu pel que pasaron toles sociedaes, y que vive un poco nes fiestes en honor a Saturno.

Y los romanos quixeron que’l templu de Saturno fuera erariu, porque nel tiempu en qu’esti habitó Italia dizse que nun se cometió nengún robu nes sos fronteres, o tamién porque cuando él reinaba nun había propiedá privada:

              Y mesmo señalar el campu o xebralu con una llende 

              nun lo permitía la llei divina: queríen lo común. 

Virgilio, Georgicas, I, 126-127

Por eso se colocaría nel so templu la riqueza pública,  porque con él too debió ser común a tol mundu. Espero non omitir que tán colocaos unos Tritones con trompetes na parte superior del templu de Saturno yá que desde la so evocación hasta la nuestra dómina la historia conozse y prácticamente fala por sí sola, pero antes yera muda, escura y desconocida, cosa que simbolicen les coles de los Tritonis, somorguiaes en tierra y escondíes. (Más sobre historiografía romana, calca aquí)

Restos actuales del templu de Saturno, nel Foru Romanu. (Semeya d'Artehistoria)

Planu del Foru Romanu en tiempos del Altu Imperiu. A la izquierda, cerca de los Rostra, el Aedes Saturni (Templu de Saturno). Imaxe de LLPSI (Örberg)

¿Cuándo se celebren les Saturnales?

Nesto Macrobio tien les sos dudes, pero una idea clara podemos facenos:

Volviendo al tema de les Saturnales, yera sacrilexu entamar una guerra cuando les Saturnales, y ye de mal agüeru desixir castigos pa un criminal nesos mesmos díes. Cuando los nuestros mayores, les Saturnales acababen nun día, que yera el 14^u día antes de les Kalendes de Xineru (19 d’avientu), pero depués César amestó-y a esti mes dos díes, entamó a celebrase nel día 16^u (17 d’avientu). Por esto depués se fizo que contaran más díes como de Saturnales porque como el pueblu nun sabía del too cuálu yera’l día de les Saturnales, algunos lo celebraben desde’l día que metió César y otros a l’antigua usanza.

Tamién existe la opinión ente los antiguos de que les Saturnales s’estendíen siete díes, si podemos mentar esta opinión, qu’afirmen autores importantes. Por exemplu Novio, escritor atelanu bien reputáu, diz:

                Va tiempu que lleguen los siete esperaos díes de Saturnales                                                                          Novio, Fab. inc., frag. 3

¿Y el 25 d'avientu? 

Anque Macrobio paez nun comentar yá nada d’esto nesta obra, yá que nun son propiamente Saturnales (estes acabaríen el 23), a finales de les Saturnales tien llugar un fenómenu cosmolóxicu, y por tanto oxetivu y común a toles cultures, y ye’l solsticiu d’iviernu.

Los romanos xusto depués de les Saturnales celebraben el Dies Solis Invicti (Día del Sol Invictu), celebrando que’l sol vuelve a ganar a la nueche. De fechu, el Sol Invictu personifícase nel dios Mitra, proviniente del mazdeísmu, relixón oriental. Aparentemente, los cristianos colocaron el nacimientu del so mesías na fecha en que naz, precisamente, el Sol.

Baxorelieve del Sol Invictu (Mitra)

Comentariu etimolóxicu aparte: la palabra asturiana “solsticiu” vien del llatín “solstitium” que ta compuesto de los raigaños “sol” (sol) y “status“, nel verbu “stare” (tar en pie, tar firme). 

Y en vez de con un "Bon Nadal" o "Feliz Navidá", como felicitaben los romanos estes fiestes...

Io Saturnalia!