El papiru: hestoria, tipos y fabricación según Plinio el Vieyu

[...] 

[68] Tovía nun toquemos les plantes d’agua nin los arbustos de ríu, sicasí antes d’apartanos del tema d’Exiptu, vamos falar de la naturaleza del papiru, por depender la vida humana del gran usu del “papel”(1), y ciertamente la memoria.

[69] Según el autor M. Varrón, esti inventóse cola victoria d’Alexandru Magnu una vez fundó Alexandría n’Exiptu(2). Antes nun hubo usu de papel: nes fueyes de les palmeres primero s’escarabayaba, d’ehí en corteza de ciertos árboles. Depués los documentos públicos escribiéronse en volúmenes de plombu, en siguida tamién se facíen asuntos privaos en tela o cera. Atopamos l’usu de tablilles antes inclusu de tiempos de Troya en Homero, pero avanzando él que nun ye la mesma tierra qu’agora s’entiende por Exiptu, yá que en Sebenítico y Saite, provincía suya(3), naz tol papel, tierra añadida depués al Nilu.

[70] Sin duda dicía que la tierra distaba un día y una nueche de barco con veles de la isla Faro, que agora ta xunía por una ponte a Alexandría. En siguida pola rivalidá ente los reis Ptolomeo y Eumenio poles biblioteques, acabando Ptolomeo col papel, diz el mesmu Varrón que s’inventaron les llámines de Pérgamo. Depués volvió a propagase indistintamente l’usu d’esto de lo que depende la inmortalidá de les persones.  

[71] Poro, el papiru naz en plantes palustres d’Exiptu o nel agua calmao del Nilu onde desborda y queda estancao con non más de dos coldos (88,71 cms) de profundidá. Tien raigaños del grosor d’un brazu, de corte triangular, acabáu en punta fina con una lonxitú de non más de diez coldos, fina con una punta como la del tirsu(4), nun tien simiente nin otru usu que’l de coronar a los dioses coles sos flores. 

[72] Los nativos utilicen los raigaños como sustitutu pa la madera, non tanto pol fueu, sinón pa tamién otros recipientes. Del propiu papiru texen embarcaciones y cola corteza les veles y les cubiertes, y tamién vestíos, amás de manteles y sogues. Tamién lo mazcaben crudo y cocho, tamién consumíen la so cozumbre. 

[73] Naz tamién en Siria per onde’l llagu del cálamu goloroso que menté(5), y nun sirve pa otra cosa que pa que’l rei Antígonu(6) saque d’él cuerdes pa los barcos, porque nun llegara tovía l’espartu. Va poco tamién se conoz que’l papiru naz nel Éufrates per onde Babilón y tien el mesmu usu como papel, y, sicasí, hasta agora los partos prefieren entretexer(7) les sos lletres en teles. 

Planta de papiru, cyperus papyrus. Imaxe propiedá de Kurt Stüber.

[74] Prepárase el papel con papiru xebrao con aguya en corteces perfines y lo más anches posible. El principiu ta nel centru, y d’él les corteces van fendiéndose por orde. Llámase “xerático” al papel qu’antiguamente taba dedicao a llibros litúrxicos. Recibió esti nome pola adulación d’Augusto y de la so segunda muyer, Livia. Asina desciende la xerática al tercer puestu. 

[75] El siguiente puestu diérase-y al “anfiteátricu” pol sitiu de fabricación; sacólo el llistu de Fanno del taller en Roma y fízolo más fino, pasando a ser el principal pola curiosa innovación y dio-y nome. El papel que nun se tratara d’esti xeitu, permanecía col nome d’anfiteátrico. 

[76] Depués d’esti vien el “saítico” de la ciudá onde ta la mayor fertilidá, a partir de llimadures más barates, y más averao a la corteza el “teonético”, d’un sitiu cercanu, agora esti viéndese al pesu, non por calidá. El emporítico, inútil pa escribir, presenta un usu como emboltoriu d’otros papeles y empaquetao pa mercaderes, por eso recibe tamién nomatu de los mercaderes. Depués d’esti ta el papiru y la so parte esterna, asemeyada al xuncu y que sin duda nun val nin pa facer cuerdes sacantes que tea húmedo. 

[77] Téxese too nuna mesa moyada n’agua del Nilo. L’agua turbio sirve como pegamentu. Primero estiéndense sobre la mesa rectes les llámines boca arriba cola llonxitú que’l papiru podía tener, recórtense sobrantes peles dos partes, depués remátase faciendo un enreyáu con llámines perpendiculares. Aplástase con una prensa, déxense los tapices secar al sol y xúnense ente sí, siempre cola disminución de la calidá de les más cercanes hasta les peores. El rollu nun tien nunca más de venti. 

Nesta semeya de papiru puen vese claramente les tires entretexíes, en disposición perpendicular.

[78] Hai abondes diferencies na anchor del papel: el meyor tien 13 deos (240,253 mms), el xerático tien dos menos, el fanniano diez (184,81 mms), uno menos el anfiteátrico, unos pocos menos el saítico, que nun ye abondo nin pal martiellu; pues el emporítico de llargo nun pasa de los seis deos. Amás tiense en cuenta nel papel la finura, densidá, blancura y cómo de lisu ye. 

[79] La primacía camudóla Claudio César, claramente los cálamos nun toleraben un papel demasiao fino como el “augusto”. A esto hai que añadir el mieu a que hubiera borrones na parte trasera cuando envía cartes y les otres quedaren fees a la vista por ser translúcides. Asina de la segunda corteza facíense barengues y de la primera teles. Tamién aumentó l’anchura a un pie (29,57 cms). 

[80] El macrocolo tenía tamién el tamañu d’un coldu (44,355 cms), pero esa midida tenía un fallu: al arrancar una única tira, más columnes se destruíen. Por esto prefirióse el papel claudio a toos, y caltúvose’l prestixu del augusto pa les cartes; liviana conservó el so puestu, anque nun fuera de primer calidá, sinón dafechu de segunda. 

[81] La rugosidá allísase con diente o concha, pero entós les lletres puen acabar por desapaecer. El papel pulío absorve menos, pero brilla más. El líquidu que s’echó de forma poco curiosa antes nótase decutiu, y déxase ver con golpe de martiellu ya incluso pol olor, cuando se fai con menos cuidáu. Tamién se dexen ver manches con forma de llenteya, pero cuando s’amesta en mediu de les xuntures una tira absorbente, malpenes s’aprecia’l fongu del papiru menos porque se corren les lletres. Muncho pueden tangate. Asina, otra vez hai que volver a texelo. 

[82] La cola común entemezse de la flor de farina con agua ferviendo, espardiendo un poco de vinagre, porque la del artesanu y la goma son fráxiles. Val más colocar migues blandies de pan fermentao en agua ferviendo, d’esti xeitu queda una capa intercalada perfina y supérase hasta la finura del Nilu. Sicasí, nengún tipu de cola debe tener nin más nin menos d’un día. Depués adelgázase con un martiellu y cúbrese con cola y, otra vez, quítense les aspereces prensándola y estiéndese col martiellu. Asina seríen los documentos antiguos. 

[83] Vi manuscritos de Tiberio y Gayo Graco en casa del ilustre poeta y ciudadanu Pomponio Segundu, con más de 200 años d’antigüedá. En realidá vemos con frecuencia los de Cicerón, los del divinu Augusto y los de Virxilio. 

[...]

Plin. Nat. XIII, 21-26

Plinio el Vieyu, consideráu "l'home más sabiu de la so dómina" (suae aetatis doctissimus) en palabres d'Aulo Xelio nes sos Nueches Átiques, foi un intelectual escritor, ente otres obres, de la Historia Natural.

Plinio tuvo carrera militar en Xermania y foi funcionariu en Tarragona, nacíu nuna colonia de l'actual Lombardía, foi de clase acomodada y acabó morriendo en Miseno viendo la esplosión del Vesubio que llevó consigo la sepultación de Pompeya.

Aparte de la Historia Natural escribió una biografía sobre Pomponio Secundo, segundu comandante en xefe en Xermania, cuando'l so serviciu militar. Amás escribió unes Bella Germaniae, mientres cumplía serviciu militar nel Rin, amás d'una historia A fine Aufidi Bassi, onde lo dexó Aufidio Baso, que continuaba la obra de Tito Livio.

En cualquier casu, la obra historiográfica de Plinio nun tien tanta importancia como qu'escribió la Historia Natural, única obra que conservamos. Esta obra ye una especie d'enciclopedia en que trata munchos temas d'una manera asemeyada a la de la famosa serie Cosmos. Entama pol cosmos y va baxando a la xeografía, l'humanu, los animales, les plantes y finalmente los minerales y materiales. Ye precisamente ente los capítulos de les plantes onde fala del papiru, y d'ehí los sos usos. Tamién tien dedicaos llibros a farmacéutica tanto d'orixe vexetal como animal.

(1) Que conste que con esti papel nun se refier al papel a partir de fibres de celulosa proviniente de China.

(2) Hai muestres de papiru de la segunda metá del sieglu V a.C. en Grecia, vid. A. Alexopoulou et Karamanou: The Papyrus from the ‘Musician’s Tomb’ in Daphne MΠ 7449, 8517-8523.

(3) Estes provincies llámense “nomos”, división territorial d’Exiptu que gobernaba un nomarca designáu pol faraón. Esta división xeográfica funcionó tamién en dómina helenística y romana.

(4) Símbolu con forma de cayáu cubiertu de vide o hiedra y llazos, símbolu asociáu al dios Baco.

(5) Cf. Plin., X II104

(6) Lugarteniente d’Alexandru, dominó Siria, Asia Menor y Mesopotamia hasta Babilonia y proclamóse rei nel añu 306 a.C.

(7)  La palabra testu ta relacionada etimolóxicamente col verbu texer (textum y texere en llatín), bien sea porque se texe’l material onde s’escribe, bien porque, visto más poético, entretéxense les lletres y palabres pa facer un tapiz, que ye’l testu.