Mi ma tenía diccionarios de francés, alemán ya incluso euskera y de bien guaḥe tuvo a bien enseñame francés en casa. Esa herencia llevóme a estudiar filoloxía clásica y alemana na Universidá d'Uviéu, como un xoven Schliemann pero sin perres.
Al añu de rematar los mios estudios saqué plaza a la primera de profesor de llingües clásiques en Castiella y Lleón, onde trabayé cinco años, antes de traslladame a València, onde pongo clase agora.
Como los filólogos clásicos valemos un poco pa too, tamién saqué la plaza de lengua castellana col envís de nun exercela nunca, pero por si los ignorantes del gobiernu de turnu nun me dexen enseñar llatín y griegu. Si tien que fundir el barcu, yo nun diré darréu.
Con 16 años gané el mio primer (y de momentu únicu) premiu de lliteratura, en participar nel concursu del Festival de Teatro Grecolatino de Xixón con un relatu llamáu "La inspiración del hombre", que acabó espublizándose en 2015 na antoloxía "Amicus amico: la inspiración de las musas". En 2018 espublicé un conatu d'ensayu a partir d'una traducción del llatín a l'asturianu na revista de literatura asturiana moza "Formientu".
Actualmente tengo proyectos literarios como novelizar una de les grandes histories de la lliteratura griega, escribir la mio propia novela a partir d'una novela curtia qu'entamé cuando estudiaba, y traducir del llatín y l'alemán al asturianu col envís d'espublizales.
